நாளைய தினம் தனியார் பேருந்து போக்குவரத்துக்கள் யாவும் நிறுத்தம்…
மக்களின் கடையடைப்புப் போராட்டத்துக்கு முழுமையான ஆதரவை வழங்கும் முகமாக, நாளை வியாழக்கிழமை தனியார் பேருந்துச் சேவைகள் இடம்பெறாது என்று, வடக்கு மாகாண தனியார் பேருந்து உரிமையாளர்களின் சங்கம் தெரிவித்துள்ளது.
வடக்கு – கிழக்கில் நாளை வியாழக் கிழமை கடையடைப்புக்கு அழைப்பு விடுக்கப்பட்டுள்ளது. இதற்குப் பல்வேறு தரப்புக்களும் ஆதரவு வழங்கியுள்ளனர். இந்த நிலையில் வடக்கு மாகாண தனியார் பேருந்து உரிமையாளர் சங்கம் தாமும் ஆதரவு வழங்குவதாகத் தெரிவித்துள்ளது.
இது தொடர்பில் அதன் தலைவர் சிவபரன் தெரிவித்ததாவது,
காணாமற் போனோரின் உறவினர்களின் போராட்டத்துக்கு நாம் ஆதரவு வழங்குகின்றோம். அவர்கள் வடக்கு-கிழக்கு முழுவதிலும் கடையடைப்புக்கு கோரிக்கை விடுத்துள்ளனர். இதற்கு ஆதரவு வழங்கும் வகையில் நாளை வியாழக் கிழமை வடக்கு மாகாணத்தில் தனியார் பேருந்துச் சேவை நடைபெறாது – என்றார்.
